مدرسة القيادة السعودية في جامعة الاميرة نوره , و كلمة ( ادفعي ) .

السلام عليكم ورحمة الله .،

 اهلا بكل المهتمات بموضوع القياده وقواكم الله انتم قدها 💪🏻.،

 في البدايه ، ظروري اوضح لك عزيزتي القارئة ان هذا المقال مجرد تجربتي الشخصيه و شوية حلطمة ونصائح من وجهة نظري خذي منهاوخلي واتمنى ان رحلتك في تعلم القيادة ممتعه وسهله و سلسله . سالفتي طويله اعذروني على التفاصيل الدقيقه لاني ماابيكم تمرون بنفس التجربه كنت اتمنى احد شاركنا تجربته زي هالتفاصيل والمصداقيه قبل اسجل معهم بس حسافه اكلتها .

 بخصوص التجارب اللي حولي 2 صديقاتي وبنت خالتي سجلو معهم لكن تدريب من الصفر و ماكان مستواهم جيد هم يعترفون بهالشي لذالك اعادو اكثر من مره بعدين اخذو الرخصه لكن انا كنت اسوق من وانا في الثانوي و اسوق بالرياض بشكل متقطع اموري طيبه و في اختبار تحديد المستوى اثنت علي الفاحصه فمستواي مو مستحق كل هالاجراءات .

 رحلتي مع المدرسة السعودية للقيادة بشكل رسمي كان في 2019 لما سجلت في موقعهم باني ابي تدريب ،وصراحة نسيتهم وماكنت ماديا قادره اني اتدرب او اشتري سياره ، المهم في اول 2020 عرفت انو ممكن احجز موعد لاختبار تحديد المستوى وبعدها ابدا تدريب وماني مضطره انتظر ، اتصلت اكثر من مره انتظار انتظار ما يمسك الاتصال و مليت وانا اكرر الاتصال اكثر من يوم وفي اوقات مختلفه . وقتها صارت ازمة كورونا ووقفت المدرسه بعد ، المهم انو في واحد سبعه 2021 قررت اتصل واحجز موعد اختبار تحديد مستوى ،

 وتم الموضوع بكل سلاسه متى تبين وكذا بتوصلك رساله تاكيد واي رساله من المدرسه يابنات لا تهملينها مسك الاتصال و ردو خدمة العملاء ممتازين في التجاوب لكن بقلة معرفه يعني تصرفلك اجابه من جيبها ترجعين تتصلين تعطيك اللي بعدها معلومه مختلفه . اول تجاوب مافي حاليا لهالشهر عندك بعد شهرين وحجزت ووصلتني رساله . صديقتي اتصلت بعدي بساعه وحجزت الاسبوع الجاي من وقت المكالمه .

 يوم الاختبار رحت لمبنى المرور داخل الجامعة اللي تدخلين المدينة الجامعيه من عند الدوارتروحين يمين لازم يكون معك هويتك , محصنة الجرعتين , لابسه كمام او نقابك ما تنزلينه جيت قبل الوقت بعشر دقايق و مافي زحمه ولا سرى كثير تحققت من الهويه وقالت انتظري دقايق يجون البنات اللي معك يطلع معك في اختبار تحديد المستوى بنتين و تتناوب الرحله بينكم , وحده تشغل السياره وتطلع من الموقف وتمشي مسافة 2 كلم بعدين تقولها صفي على جنب , يلا اللي بعدها .الحظيظه هي الثانيه لانها ماهي مضطره توقف السياره في موقف او تطلعها بالنسبه لي مو صعب المهاره بس بسبب التوتر والزحمه في المدينة الجامعيه نفسها مااحب اختبار الباركنق نرجع للمبنى وصلو البنتين معي بنفس الوقت ( خليك منضبطه بالوقت الناس تتضرر معك )

 طلعنا مع الفاحصه رائعه جدا واخلاقها عاليه قالت اختارو من الاولى وقسمنا انفسنا بشكل تلقائي انا وانتي وهي انتبهو تتجادلون كنت انا الثانيه وقت الاختبار كانت تسالني اسئلة خفيفه كم سرعة الشارع ؟ الاولوية لمن ؟ ماهي خطوات الانعطاف؟ 

ورجعتنا اللطيفه الثالثه الى المبنى وصفت بشكل انسيابي .فعلا كنّا قروب متمكن قالت كلكم 6 ساعات . طلعنا من عندها على سيارتنا الى المبنى اللي خارج المدينة الجامعه مدري وش اسمه صراحه بشكل شكله الاداره وخدمة العملاء كان فيه انتظار كبير بس لسرعة البنات ماشاء الله تقريبا 20 دقيقه ووصل رقمي .دفعت حق 6 ساعات +اختبار تقريبا640 ريال قالت انتظري يتصلون عليك يحددون وقت التدريب تقريبا خلال 3 اشهر من اليوم .

 مرت الثلاث اشهر محد اتصل , اتصلت عليهم خلال هالمدة تقولي انتظري انتظري انتظري اخر يوم قلت خلاص الوقت المتوقع انتهى متى راح ابدا قالت انتظري . سكرت منها ورجعت اتصلت على طول و قالت لي اللي بعدها تقدرين تبدين من بكره ( قلت لكم معلوماتهم ونظام خدمة العملاء الهاتفي مضروب ) بديت مباشره 3 ايام تحددين اليوم اللي يناسبك والوقت اللي يناسبك من المتاح و بس تبدين مافي توقف الا انك تتصلين قبل بوقت كافي يعني ماتقدرين تحضرين بكره تتصلين اليوم مو تتصلين في نفس اليوم وتطلبين منهم ايقاف التدريب وبيوقفون لك , وبعدها اذا حابه ترجعين تتدربين تتصلين تكملين حجز ساعاتك .

 هنا حصلت لي مشكلة معهم بذكرها بوقتها خلينا في تسلسل الاحداث . 

كان تدريبي الاربعاء -الخميس -الاحد . الجمعه والسبت اجازتهم حضرت الاربعاء قبل الوقت بنص ساعة رحت مبنى التدريب بعد ماتدخلين المدينةالجامعيه ويجيك الدوار الصغير تاخذين يسار اول مبنى على يمينك اول ماتدخلين فيه موظفه تسالك وش اسمك وتطلع لك جدولك وتقولك روحي انتظري عند سيارتك تجيك المدربه . رحت لسيارتي وبدا الوقت ,وماجت المدربه الا بعد 10 دقايق بدينا بالتدريب تقريبا 1:10 دقايق ظهرا ( اسوء الاوقات هو بعد الظهر نظرا لزحمة المدينه الجامعيه بموظفين وطالبات الجامعه ) ع 1:40قالت ارجعي للمبنى باخذ بريك خمس دقايق . مو من حقها ابدا بس يلا شوية انسانيه . بعدين قالت خلاص مهارات داخل المدرسه باركنق وكذا ع 2:30 قالت خلصنا ,ابدا ماخلصنا باقي لي 10 دقايق قالت خلاص مايمدي اي شي ننتظرفقط انتظار الوقت وطبعا الوقت كله 1 و اربعين دقيقه مو ساعتين كاملات لان من حق المدربه ربع ساعة بريك بين كل متدربه لانه يعطونها 4 متدربات باليوم تمام مااختلفنا لكن ليش المدربه تتاخر عن حضور الساعة اللي قبلها اذا هي ماخذه ربع ساعة بريك .مو مقتطع بغير حق من وقت المتدربه . انتهى هاليوم وانا مو راضيه ابدا على مستوى التدريب ولا انضباطهم ,

 بدينا الخميس لابسه عباتي بطلع ويجيني اتصال من المدرسه قالت المدربه تعتذر عن الحضور و مافيه بديله لذالك اليوم تكنسل وراح يتم اعادة جدوله لجدول تدريبك باذن الله بحيث يكون عندك الاحد والاثنين نفس الوقت ونفس المدربه ,قلت تمام لكن غيري المدربه قالت اوكي الاحد اتصلي على خدمة العملاء غيريها . اتصلت الاحد اعدت جدولة جدولي مع مدربة ثانيه .كملنا الاثنين و جميل جت على الوقت وبدينا تدريب والامور تمام ,خلصنا يومين معها بدون اي ملاحظات ولا اشكاليات ياناس اتقوا الله و ادو الامانة انتي مستاجره لاداء مهمه وبتاخذين عليها مبلغ حلليه واديها على اكمل وجه تكسبين دين و دنيا . بعد نهاية 3 ايام تدريب حجزت اختباري كان الاربعاء الساعه 1 الظهر . جيت قبل الوقت بنص ساعة الى مبنى 2 مقابل لمبنى 1 سلاسه و مرونه في الاجراءات تتحقق من هويتك توجهك لفاحصتك تقولك انتظري لوقت الفحص و لوصول البنت الثانيه اللي معك ( تاخرت 20 دقيقه ورفضت الفاحصه تبدا بدونها ) وهذا اسميه ضعف في ادارة الازمات وتنظيم الوقت 

جت البنت تركض و ما تحققت من هويتها الفاحصه الا في السياره ولانها جت والفاحصه ع الباب استلمت المفتاح مباشرة وراحت تركض للسياره انا بنفسي اقول ووووتتتتتت ايش قاعد يصير. ( نصيحتي لك لا تجلسين في الانتظار وقفي ع الباب اذا انتي حابه تكونين اللي تحركين السياره ) مو دايم تلاقين فاحصه عسل وتقدر انك جايه بدري . وماله داعي النقاش والاعتراض منك وفري طاقته في الهوشه معهم على الاشياء الثانيه نتيجه لان البنت جت تركض ومتاخره و متوووتره الف شغلة السياره 3 مرات المره الاولى تشغيل عادي , الثانيه اخذت ثواني من تشغيلها الاول ثم ادارت المفتاح قالت لها الفاحصه لا لا خلاص شغاله قالت البنت اوكي اوكي , خمس ثواني ورجعت حركت المفتاح يااهووووه البنت متوتره خليها ترتاح وتصيرالثانيه ظلم لها بعد طلعت البنت من الموقف و طلعنا من المدرسه اول ملاحظه كانت مو مركزه ابد تبي يمين داقة الاشاره يسار والفاحصه تقولها ركزي ركزي انتي الان في الشارع ارواح الناس مو لعبه , طلعت من مبنى المدرسه على اول شارع في المدينة الجامعيه ومشت اكثر من 60 على الشارع وتقولها الفاحصه هدي هدي و اللي قدامنا خفف السرعه عشان المطب وكنا بندخل فيه , ي جماااااعه مسررررحيييييييه انا جالسه ورى واستغفر عشان ما انزل من الغبنه والسيارة تمشي . 

هذا دليل على ضعف مهارات الفاحصه اولا لانتظار البنت وضيقت على المختبرتين ( انا وهي ) الوقت تقولنا بسرعه وراي مختبرات اخرى انا وش ذنبي اتوتر مع البنت اللي متوتره بسبب تاخرها . اقلها لو خلتها البنت الثانيه في الاختبار يكون افضلها ترتاح في وقت اختباري عشان تعرفون ان موظفات مدرسة القيادة مو كلهم مؤهلات نفسيا و لا مهنيا . واتحدى احد يعارضني . نرجع للبنت اللي عندها اختبار تعدينا الصدمة الاولى مشينا تقريبا 3 كلم قالت لها خلاص ادخلي المواقف , ودقت اشاره هي و دخلت في السياره اللي جنبنا وتدخلت الفاحصه للمره الثانيه بفرامل . طبعا خلاص راسبه من اول مره كانت بتصدم لان بمجرد تدخل الفاحصه ترسب المختبره . 

جاء دوري الان , طبعا اخطائي كثيره لاني اخذت الوضع باريحيه تاااااامه : خذي النصايح , 

1) لا تسولفين من الفاحصه ابد ولا تردين عليها ولا تسالينها . قالت لفي لفي بصمت . 

2) امسكي الدريسكون مسكة صحيحه . 

3) تلفتي كثيييير خليها تشوفك حريصه . 

4) الاشارة ظروري جدا . 

5) التزمي بسرعة الشارع . ( كنت اقل من سرعة الشارع قليل و تقولي دوسي دووسي زيدي سرعتك . زدت سرعتي عشان اتجاوز سيارة قالت لي ليش تسرعين خففي ) 

6) اتركي مسافه بينك وبين المركبه اللي امامك لا تسوين محترفه واعرف انها بعيده عشان ماتتدخل الفاحصه بالبريك .

 7) اشارة توقف ظروري توقفين , فيها رسوب تام . طبعا كلها ملاحظات انا غلطت فيها اللي يقولك مجرد ملاحظات غلطان لانها تسجلها في الاستماره وبمجرد ما تكتمل 12 ملاحظه تقولك رسوب بعض الملاحظات تتكرر يعني مثلا فقط عطتك ملاحظه اشاره و التفات لكن تكتب جنبها تكررت المخالفه 4 مرات عشان توصل 12 وترسبك لاحظي قلت ترسبك وهذا اللي صار معي في الاختبار الثاني , شغلة تنجحين بسهوله هذا على حظك .

 بعض الفاحصات ماتعطي ملاحظات فقط تسجل عليك , تنبهك في وحده وتلاقينها كاتبه عشرة في الاستماره . اللي سبب رسوبي بشكل اكبر في الاختبار الاول هو الباركينج .الفيديو التالي شرح . 

لما وقفنا السياره قالت انزلي فضلا اعطي كل بنت نتيجتها لوحدها ,طبعا البنت رسوب وانا رسوب . قلت اسمحي لي انتي تدخلتي ومااعطيتني وقت وهذا موقف طارئ ومايقيس مهاراتي في القياده كان الامكان الانتظار قالت عندك اعتراض قدميه للاداره ونزلت , طبعا انا في قرارة نفسي من اول وعلي ملاحظات فخلاص الرسوب هنا حق . 

دخلنا المبنى اعطتنا التقرير , رجعنا لمبنى التدريب 1 عشان ندفع حق 4 ساعات اعاده + اختبار بـ 475 ريال. بعد مارجعت البيت اتصلت على خدمة العملاء حجزت الخميس والاحد تدريب بنفس الوقت .جيت الخميس على الوقت بالضبط رحت لسيارتي , انتظرت المدربه 25 دقيقة ماجت بعدها جت مدربه وقالت ماعليش حصلها ظرف واعتذرت وانا بدالها يلا معنا 75 دقيقة تدريب . انسانه زي العسل و حللت كل وقتها معاي , استاذتني دقيقتين تنزل من السياره لان ظهرها عورها و رجعت تكمل تدريب وبكل امانه في الشرح . يوم الخميس حسيت اني تعبت ابي بريك منهم فاعتذرت نهاية اليوم عن يوم الاحد اني ماراح اجي قالو اوكي تكملين الاثنين مع نفس المدربه ووصلتني منهم رساله نصيه انو على نفس جدولك تكملين . جيت الاثنين وانتظرت عند نفس سيارتي جت المدربه بنفس الوقت بس معها بنت ثانيه قالت لا نزلها هي جدول جديد روحي راجعي خدمة العملاء . يوم جت ع الوقت طلعت مو مدربتي حظي واعرفه . رجعنا لمبنى واحد وانتظرت في انتظار طوييييل واضح لخبطة جداول في هذاك اليوم .وصل دوري قلت ابي طباعة جدولي طبعته طلع عندي يومين قلت في خطاء انا باقي لي يوم واحد فقط قالت روحي لسيارتك الان عشان مايضيع عليك الوقت و ارجعي نراجع الاشكاليه رحت للسياره لقيت المدربه فيها تنتظرني قالت تاخرتي مره قلت مشكلة في الجدوال والا انا موجوده قبل الوقت , قالت انتي نزلتي معي اليوم ماكان عندي احد , قلنا اوكي قالت بس السياره مافيها بنزين بروح اعبيها وارجع فقط حركيها لما بوابات المدينه الجامعيه وانا اكمل بعدك قلت عفوا من وقتي قالت ايه للاسف المفروض اللي قبلي تعبي بنزين بس ماعبت الله يهديها .

 اضحكو ياجماعه على التنظيم والتعاون الاكثر من رائع الضحيه هي المتدربه فقط والله لو مشكلتي معهم التدريب قلت مو مشكله ماني في حاجة هالدقايق مستواي متقدم بس مشكلتي معهم التعقيد و حقهم ياخذونه منك وحقك انسييييه . قلت اوكي يلا ياانشراح نعبي بنزين . مدرسه قيادة اقرب محطة بنزين لها تبعد تقريبا 8 - 6 كلم عن بوابة المدينة الجامعية طبعا رايح جاي كم تاخذ وقت تتوقعون ! لما وصلنا المحطه المدربه مسويه محترفه صفت جنب ماكينة البنزين ع الريوس قالها العامل لا تعالي الجهه الثانيه قالت مااتحرك يلا عبي بس وانت ساكت قال مافي عبي وراح لخوياه وقال لحد يعبي لها الا لما تجي الجهه الاخرى , وجلست تدقق بواري يلا عبي يا وصخ يا طووووووط ( الاسلوب صفر والتفكير بالسالب ) قلت ي بنت الحلال خلصيني وعبي باي شكل هذا كله من وقتي قالت والله ما يمشي كلامه وترجع للمدرسه ما عبينا . دخلنا المدرسه صفت السياره نزلنا لبمنى 2 دخلت قسمهم قالت تخيلو المحطه الـ طووووط ماعبى لي الخ تشرح لهم قلت لحظه هذا كله من وقتي من يعوضني قالو قدمي شكوى اذا خلصتي تدريب اليوم على خير .روحي بس تسليييك ,اخذت مفتاح سياره ثانيه وبدينا تدريب تقريبا 2:05 , خلصنا 2:40 بنفس وقتهم مافي اي تعويض .و رحت لخدمة العملاء عشان اشوف جدولي قالت عليك رسوم يوم ادفعيها , قلت انتم اللي اضفتوه مو انا هذا خطاء خدمة العملاء قالت روحي اشتكي ,  اشتكي مين قالت دقي على خدمة العملاء هاتفي يفيدونك ,طيب وقتي اللي ضاع اليوم عشان لخبطتكم و بنزينكم قالت مالي علاقه قدمي شكوى على مين قالت خدمة العملاء هاتفي . وقتها رحت لادارة التدريب بنفس المبنى قلت مو معقول اللي قاعد يصير جلسة معي مشرفة هناك ماادري وش دورها سمعتني وقالت ما بيفيدك الا تجين الصباح للمبنى الاداري وتقدمين شكوى هناك عند وحده قالت لي اسمها بخصوص اليوم اللي عليه لكن ضياع الساعه محد بيساعدك فيه مافيه بند لهالشي اصلا . او تواصلي مع خدمة العملاء الصباح وبيفيدونك ان شاء الله 

طلعت من بكره اتصلت على خدمة العملاء قالت برفع لك شكوى بخصوص اليوم , من بكره ايش صار على الشكوى قالت مافي شي مرفوع لك , ارفعي لي لو سمحتي قالت طيب وهنا انا اقولكم الشكوى رقم ثلاثه .من بكره اتصلت عليهم ايش صار بخصوص الشكوى قالت مافي شكوى في النظام اعطيني نص الشكوى عشان ارفع لك قلت لا شكرا سكرت ورحت للمدرسه وقابلت الانسانه اللي قالو لي عليها من اول قالت الحين ارفع لك شكوى . تلفت اعصابي ي جماعه واخذت رقمي على اساس ترسل لك اذا تم الغاء هاليوم . الهدف من تصرفهم السابق اني ادفع حساب هاليوم وانا رفضت لكني دفعته بنزين رايحه جايه للمدرسه . بعدين قالت لي روحي وانا اتصل عليك . ارسلت لها من بكره ايميل ايش صار قالت جاري العمل عليها .اليوم اللي بعده ارسلت ايميل مافي رد منها الى 7 ايام محد رد . خلاص انفجرت كنت بروح لقسم الرجال في مرور الجامعه والا يجيني اتصال منهم خدمة العملاء قالت لي تم الغاء اليوم عنك وتقدرين تحجزين اختبارك . 

حجزته اليوم اللي بعده مباشره وقلت الساعه 9 بليز . وصلت قبل الوقت ونفس الموضوع قبل البنت وانتظرت برا وجت البنت قالت الفاحصه انا ابيها هي تبدأ . قلت مو الحق لي انا وصلت اول قالت في الكشف هي اول ( قلت لكم لا تجادلون بس مدري ليش سالت ) حركت البنت السياره وكانت حقيقي صفر في طريق فاضي كانت تكبس فرامل تقولها شفيك تقول سوري سوري بدون اشارات وما تلتفت والدوار كان فيه حاجز لمسار اليسار يعني تقدرين تسوين يوتيرن ولو دخلتي الدوار رسوب , قالت لها الفاحصه سوي يوتيرن و دخلت البنت الدوار رغم وجود الحواجز وهنا رسبت غير المهارات الاخرى . قالت لها الفاحصه مااعرف كيف تجاوزتي التدريب. جاء دوري حرفيا بروفشنل ولا اعطتني ولا ملاحظه ولا اي تعليق الا شغلة كانت لوحة قف والشارع فاضي التفتت , دقيت اشارة , هديت كثير يمكن خمسه امشي وانعطفت قالت ليش ماتوقفتني قلت كنت شبه متوقفه والشارع فاضي قالت لا ماينفع * هنا رسبت * مشينا قدام شوي الاولويه كانت لي لدخول المواقف السياره المقابله كانت بعيد دقيت لها اشاره وهي هدت كثير يعني المجال لي فانعطفت لكنها تدخلت الفاحصه وكبست فرامل ,قلت لييييه قالت السياره قلت لي الاولويه الشارع فاضي قالت لا انتي ضايقتيه وهذا كان تعليقها في الاستماره ( لم تتوقف عند اشارة التوقف + لم تعطي الاولويه ) باقي الملاحظات يشهد ربي ماحصلت لكن كتبها وسوت جنبها اكس تو يعني حصل مرتين

 قالت لي النتيجه لما وصلنا رسوب , قلت لا اعترض , قالت ادخلي اعترضي عندهم لما دخلت وكلمت الاداره في مبنى 2 قالت الاستماره واضحه قلت وانا اقولك الاستماره مو صحيحه فقط موضوع قف افتحي الكاميرا وشوفي بنفسك قالت الكاميرا نفتحها في حال الحوادث فقط شي مضحك موجوده ديكوروالا لخدمة مصالحكم الشخصيه . قلت قف لوحدها رسوب قلت والحل قالت ادفعي مره ثانيه ومريني قبل الاختبار اشوف موضوعك للاسف ماكان عندي اعصاب استمرفي الحديث معها بس بقول وش بتسوين ؟ يمكن ماادخل في ذمتي بس مااعرف كان ممكن تمشي الامور . 

استمارة التقييم للاختبار الثاني لا وحاطه اكس مرتين حسبي الله عليك ونعم الوكيل

وهنا انتهت رحلتي مع مدرسة القيادة بجامعة الاميره نوره .

سنتين انتظار اتصال .3 شهورانتظار تدريب ,شهر تعقيد ومماطلة دفعت لهم الف وكم ريال غير مشاويري 

# جهه ماديه بحت . 

# خدمة عملاء غير مدربه .

 # مدربات غير مؤهلات . و ما عليهم رقيب في حضورهم فقط انصرافهم منضبطين . 

# نظام بدائي جدا لرفع الشكاوي ومراجعتها . 

# تعقيد في الاختبار و كذب وضعف رقابه فقط عشان تعيدين و تدفعين . 

نصيحتي : اطلعي برا الرياض وبتاخذين رخصتك باقل جهد ووقت .