بعد اللي صار لي في المدرسة السعودية للقيادة قررت اطلع برا الرياض واخذ رخصتي , رحت لمحافظه فيها مدرسة قيادة مدحوها بنات اعرفهم . طلبت اختبار تحديد المستوى
خدمة العملاء ع الواتساب , حددنا اليوم والساعه قالت لي قبلها روحي مستوصف حكومي افحصي دم و نظر
ويربطونه بابشر لتسهيل اجراءات الحصول على الرخصه لاحقا
تم موضوع الفحص وطلعت النتايج بعد نصف ساعه وصلتني رساله نصيه من افادة بانه تم ارسال نتيجه التقرير الطبي بنجاح
وصلنا للمدرسه مستواها ممتاز صراحه من حيث المبنى والموظفات والتنظيم جدا عالي , و عدد المتقدمات للتدريب والاختبارات قليل يوصل تقريبا المية
لا يقارن مع كمية صفوف الانتظار في الساعة الواحده في مدارس الرياض .
دفعت 25 ريال تحديد مستوى ,في مدرسة القيادة في نوره تحديد المستوى مجاني .
ركبت مع الفاحصه المركبه حركنا السياره كنت ملتزمه جدا بالتعليمات اللي تعلمتها اشاره انعطاف التفات الخ .
ولا ناظرت فيني, قالت صفي موقف طولي ,اطلعي منه يلا ارجعي لنفس موقفك وصفي المركبه
رجعنا قالت 6 ساعات , فرق عن مدارس الرياض وزحمتهم
ميدان شبه فاضي , صغير , ناس هاديه ورايقه ماعندها ضغط عمل .
وسرعة في الخدمة .
رجعت للمبنى عطتني جدولي يومين نظري ويوم عملي وبعده الاختبار
قلت ممكن ابدآ نظري الحين قالت طبعا تفضلي
ياااه يزينكم
دخلت الكلاس و خلصنا ورحنا البيت , اليوم الثاني نظري ايضا و الثالث كان اختبار النظري ,واجتزته الحمدلله
و دخلت ساعات الميداني ساعتين , يلا بكره اختبارك
بيوم الاختبار تنظيم ولا اروع , طبعا كالعاده الحمدلله احضرعلى الوقت
دخلتني مباشره الفاحصه بانتظاري في السياره
اهلا ماشاء الله نهاية رحلتك اليوم , هدي اعصابك مجرد اختبار بسيط
حركي المركبه و اتجهي للدوار و لعلمك الاختبار مراقب من قبل رجل المرور في غرفة الزجاج المقابله
السياره مافيها حساسات فانتبهي لموضوع الاصطدام مافي تنبيه .
مع وجود كاميرا داخليه في المركبه ( اساسا بمجرد وجود شخص اخر يقيمك هذا مريح )
اختبار الرخصه بنفس طريقة اختبار المستوى نفس المسارات .
خلاص مبروك عليك الرخصه تقدرين تستلمينها بعد نصف ساعه
الله يرزقكم جميعا شعور هالفرحه اللي ماتوصف
ياااااااااااااااااااااااااااااااااااااااااه تعبت تعبت عشان احصل على الرخصه
و بس اعيد النصيحة : لا تاخذين رخصتك من المدرسة السعودية للقيادة
خارج الرياض اقل زحمه واقل تعقيد واكثر مصداقيه زي ماذكرت وجود شخص اخر يحكم من الخارج امر مريح يشوف اشاراتك ويشوف اي خطأ يبدر منك .
شكرا لوقتكم و شاركوني رايكم
تعليقات
إرسال تعليق